ನಿರೀಕ್ಷೆ (ವಿಶ್ವನಾಥ ಬಡಿಗೇರ - ಜೂನ್ ೨೦೦೨)

ಮುಗಿಲ ಕಡೆ ಮುಖ ಮಾಡಿ ನಿಂತ
ಆತನಿಗೆ ಅನಿಸಿತ್ತು ಕಳಿಸುವುದು ದಿಗಂತ
ಒಂದಾದರೂ ಹೊಳೆಯೊ ನೀರಿನ ಮುತ್ತ
ಬೀಜ ಮೊಳೆತು, ಬೆಳೆದು ಕೊಡುವುದು ತುತ್ತ ll


ಮುಗಿಲ ಮೋಡದಿ ಜಾರಿದ ಆ ಹನಿ ಮುತ್ತು
ಪಾರ್ಥನ ಬ್ರಹ್ಮಾಸ್ತ್ರದ ರಭಸವ ಮೀರಿಸುವಂತಿತ್ತು
ಲೀಲಾಜಾಲವಾಗಿ ತೇಲುತ್ತ ಬರುತ್ತಲಿತ್ತು ಹೊತ್ತು ತುತ್ತು
ಶಿಲೆಯಾದ ಆತ ಭವಿಷ್ಯದ ನಿರೀಕ್ಷೆ ಹೋತ್ತು ll


ಬಾ ಓ ಮಳೆ ಹನಿಯೆ ಬಾ ಇತ್ತ
ಮುತ್ತ ಹನಿ ಕಾಣದೆ ಆಸೆ ಕಮರಿತ್ತ
ಬರಸಿಡಿಲು ಬಡಿದರೊ ನನ್ನ ದೃಷ್ಟಿ ನಿನ್ನತ್ತ
ಹೇಳುತ್ತಲಿತ್ತವನ ಮನ ದೊರೆಯಲಿದೆ ತುತ್ತ ll


ಬೀಜ-ನೀರ ಹನಿಯ ಸಮಾಗಮದ ಹೊತ್ತು
ಮರೆಸಿತ್ತವಗೆ ಜೀವನದೆಲ್ಲ ಆಪತ್ತು
ಎತ್ತಿಂದಲೋ ಬಂದ ಗಾಳಿ ಆ ಹನಿ ಮತ್ತೇತ್ತಲೋ ಹಾರಿಸಿತ್ತು
ಇದೇನಾ ವಿಧಿ ವಿಕೋಪದ ಕರಾಮತ್ತು ll


ಆತ ಆಸೆಹೊತ್ತು ಶಿಲೆಯಾಗಿ ಅತ್ತ
ಕಣ್ಣಹನಿ ಧಾರೆಯಲ್ಲೊ ಆಗದುಲಿಯಿತು ಬೀಜ ಭತ್ತ
ಶಿಲೆಯಾಗಿರುವನಾತ ಮುಖಮಾಡಿ ದಿಗಂತದತ್ತ
ಕಾಯುತ್ತಿರುವನಾತ ಮೋಡದಿ ಜಾರೋ ಹನಿಮುತ್ತ ll